Smartphone Technology Awareness Blog # 58 : How To Choose The Best Camera Smartphone

Dosto, pichle kuch salon se hum apne smartphone ki comparison DSLR se karte aa rahe hai.

Iska yahi karan hai ki humari Smartphone Technology aaj kafi jyada viksit ho chuki hai.

Aaj hum smartphone se hi DSLR ke takkar ki photography karte hai.

Par waise dekha jaye to aisi behtarin photography karne ke liye humare paas kitne Megapixel ke camera ki jarurat hai?

16MP?

20MP?

25MP?

Behatarin photography result ke liye kya sirf Megapixel number hi maayne rakhta hai?

Jaanenge is article mein.

.

Agar aapko koi naya smartphone kharidna hai jisme camera performance aapki priority hai to ye article aapke liye hai.

Par yahaan aap mujhe batao ki wakahi mein jyada megapixel ka smartphone camera aapko behtarin result de payega?

Agar aapko ye baat pata nahi to main ye aapko bata du ki, Megapixel hi sab kuch nahi hota.

Megapixel ye un tamaam indicators mein se ek hai, jo us particular photo ko behtar se behtarin bana deta hai.

To chaliye samaz lete hai ki humare smartphone mein Megapixel ka kya role hai.

Jisse aapko ye andaza aa jayega ki Best Camera Smartphone kharidne ke liye Megapixel ke alawa humein kya kya dekhna chahiye.

.

Megapixel Kya Hai?

Megapixel ka matlab hai Million Pixel.

1 Megapixel mein 1 million Pixels matlab takriban 10 lakh pixels hote hai.

(Technically 1 Megapixel = 1,048,576 Pixels)

Agar aap kisi photo ko zoom karke dekhoge to usmein aapko kayi saare chhote chhote square boxes najar aayenge, jinhe hum Pixels kehte hai.

Hum jab koi photo click karte hai to in pixels ka kaam hota hai click kiye hue photo ki information collect karna.

Ab yahaan pixels jitne jyada rahenge, information utnihi jyada milegi aur photo mein utnihi jyada details dekhne milegi.

Par iska matlab ye nahi ke photo ki quality bhi utnihi acchi hogi.

Camera Pixels ne ye jo information collect ki hai ismein “acchi” aur “buri” information bhi moujud hoti hai.

Photo mein kahaan light jyada hai, kahaan light kam hai, kounse colors hai, unka contrast kaisa hai jaisi baatein “acchi” information mein aa jati hai.

Par agar “buri” information ki baat karein to wahaan Noise, Grains, Low Color Contrast, Desaturate Appearance aur Blured Area ki information aa jati hai.

Aisi “buri” information jyadatar low light condition mein mil jati hai.

To aise 25MP camera ka bhi kya fayda jo is tarah se buri information collect kar de.

Ab aapko samajh aa gaya hoga ki sirf megapixel numbers badhane se aapko acchi photo nahi mil sakti.

To aisi kounsi batein hai jo is Megapixel count se bhi jyada important hai.

chaliye jaan lete hai.

.

Also Read : 

.

Sensor Size

Agar hum kisi 12MP camera smartphone ko 16MP camera smartphone ke saath compare karte hai, to yakinan humein 16MP camera smartphone se behtar picture mil sakti hai.

Par yahaan ye baat ekdum galat saabit ho sakti hai, agar dono smartphone ki sensor size same ho.

Agar dono smartphone ki sensor size same ho to humein 12MP camera smartphone se behtar picture mil jati hai.

Aakhir aisa kyun?

Agar hum firse pixel ki baat karein to ye jaahir hai ki pixel ka kaam hai information collect karna.

Ab yahaan Pixel size jitna bada hoga, information utnihi jyada collect hogi.

Comparitively Chhote size ke pixel mein kam information collect ho payegi.

Ab Camera sensor ki baat karein to ye wo jagah hai jispar megapixels basey rehte hai.

Maan lete hai ki dono smartphones mein 1.2um size ka sensor laga hai.

To us sensor par 16MP camera smartphone mein 16 Million pixel aur 12MP camera smartphone mein 12 Million pixel basey rahenge.

Ab yahaan jaahir si baat hai ki 12MP ki pixel size 16MP pixel size se badi hogi.

Jiske chalte 12MP ka camera jyada aur behtar information collect kar payega.

Aur ye jaruri baat, Pixel ka size kitna bhi chhota-bada kyun na ho, wo ek jaisi hi noise information collect kar leta hai.

Jiske chalte chhote size ke pixels mein jyada noise dekhne mil jati hai.

Dusri taraf bade pixels utnihi noise amount hone ke baavjud bhi behtar information collect kar leta hai.

Par jab same Megapixel count ho to??

Agar 16MP ke same camera smartphones ho, par agar unki sensor size alag alag hai, to kiski picture quality behtar hogi?

Yakinan jiski sensor size badi hai usi smartphone ki.

Yahi formula DSLR camera ko smartphone camera se behtar banata hai.

DSLR ki sensor size smartphone ke sensor size ke mukable kafi badi hoti hai.

.

.

Also Read : 

.

Par kya Megapixel count aur Sensor size hi aisi baatein hai jo humein naye camera smartphone kharidne ke waqt dekhni chahiye?

Nahi… Ek aur baat hai jispe hume gour karna chahiye… Aperture Size!

.

Aperture

Agar aperture ki baat karein to ye ek chhotisi khidki hoti hai, jo photo click karte samay khulti aur band hoti hai.

Aperture ka main kaam hota hai light amount ko control karna.

To yahaan aperture size jitni badi hogi, light utni jyada capture hogi.

Aur aperture size jitni chhoti hogi light utnihi kam capture ho payegi.

Aapne kayi baar f/1.8, f/2.0, f/2.2 jaise naam to sunehi honge.

.

.

To yahaan number jitna kam hoga, aperture size utnahi badi hogi.

Aur aperture size jitni badi hogi, humein low light condition mein uitnihi behtar photography dekhne mil jayegi.

Jab light condition acchi nahi hoti, to photo click karte samay aperture utnahi jyada khul payega

Jisse jyada se jyada light collect karne mein madad hogi.

Aisemein humein acchi information mil jayegi.

.

Role of Processor

Ab yahaan aap soch rahe honge ki bhai yahaan processor ka kya kaam hai?

To main ye aapko bata du, ke smartphone ka processor hi ek aisa component hai jo camera behtar performance dene ke liye madad karta hai.

.

Jaise ki humne is image mein Qualcomm Snapdragon 845 processor ke camera features ke baremein jana hai.

Ab jis smartphone mein Snapdragon 845 processor hoga, usmeein ye saare features dekhne mil sakte hai.

Thik waisehi aap jis camera smartphone ko kharidne wale ho, uske processor ke anusaar aapko camera features mil jayenge.

.

Smartphone Camera For Video

Jahaan tak baat aati hai video shooting ki yahaan kaafi saari aisi baatein hai jiske baremein hum janana chahiye.

Fir usmein aata hai Camera Resolution, Stabilization Support aur Motion Features.

Sabse pehle baat karte hai camera resolution ke baremein.

.

Resolution

Aaj kal hum sabhi smartphone users HD resolution ke bajay FullHD video recording ko jyada pasand karte hai.

Kyunki jahaan HD Resolution mein humein 1280 x 720 Pixels quality mil jati hai, wahi FullHD Resolution mein humein 1920 x 1080 Pixels quality mil jati hai.

Kayi sare smartphones mein to humein aaj 4K (3840 x 2160 Pixels) video support bhi mil jata hai, jo ki kafi acchi baat hai.

Resolution jitna jyada rahega, picture quality utnihi behtar aur sharp rahegi.

.

Stabilization

Jab hum video capture karte samay smartphone ko kisi tripot par set karne ke bajaay handy shoot karte hai, to hume shakyness ka saamna karna padta hai.

Uska yahi karan hai ki handy shoot karte samay humara haath stable nahi rehta.

Haath stable na rehne ke karan video mein thoda bahot shakte dikhayi deta hai.

Is shake ko hataakar video stable karne ke liye humein stabilizer ki jarurat hoti hai.

Smartphone mein 2 tarah ke stabilizers hote hai.

  • OIS = Optical Image Stabilizer
  • EIS = Electronic Image Stabilizer

Optical ka naam sunkar hi aapko pata chal gaya hoga ki ye stabilization Camera Lens par depend hota hai.

OIS ke liye camera lens hi kuch alag tarikese design ki jati hai, jisse optically video stabilization kiya jata hai.

To wahi EIS mein ye sab kuch software par depend hota hai.

OIS support ke liye Camera Lens ki banavat hi waisi honi chahiye.

Dusri taraf EIS support humein OTA Update ke dwara bhi mil sakta hai.

OIS jyadatar humein Flagship smartphones mein dikhayi deta hai to wahi EIS Mid-range smartphone mein paya jata hai.

Par kayi saare smartphones aise bhi hai jinme stabilization ka support hi nahi milta.

To agar aap koi naya smartphone kharid rahe hai to usmein Image stabilization ka support hai bhi ya nahi ye jarur check kijiyega.

.

Also Read : 

.

Motion Support

Dosto, motion support mein ata hai Slow Motion Video Support aur Timelaps support.

Agar aap slow motion aur timelaps ko istemal karte aa rahe hai, to aapko ye jarur pata hoga ki in features ki video shooting ke liye kya ehmiyat hai.

To naya smartphone kharidate samay in sab batonpar gour karna na bhulna.

.

Extra Features

Yahaan kayi saare aise features hai jinse aaj smartphone photography naye mukaam haasil kar chuki hai.

HDR Mode : Extreeme lighting light condition ke liye

Panorama Support : Ek hi frame mein horizontally lamba area cover karne ke liye

PDAF (Phase Detection Auto Focus) Support : Object ko autofocus karne ke liye

Maximum fps (Frames Per Second) Support : Behtar video quality ke liye

Anti-Flicker Support : Video recording ke waqt flickering rokne ke liye

Depth Sensor : Bokeh Effect ke liye

Wide Angle Lens : Maximum angle area cover karne ke liye

Monochrome Sensor : Behtarin colour reproduction ke liye

Telephoto Lens : Optical zoom ke liye

.

How to choose the best camera smartphone

Dosto, agar aapko koi smartphone kharidna hai aur aapki 1st priority hai camera to aapko kuch baatonpar gaur karna jaruri hai.

  • Sensor Size jitna bada rahega, utna behtar hoga.
  • Aperture Size jitni kam hogi utni behtar hogi.
  • Megapixel ka performance sensor size aur aperture size par depend karta hai.
  • Video shooting ke liye Resolution jitna jyada milega utna accha rahega.
  • OIS ya EIS support hai ya nahi jarur check karna.
  • Slow Motion aur Timelaps support hai ya nahi jarur check karna.
  • Jo baatein humein Extra Feature point mein cover ki hai, un feature ka support mile to bhai Sone Pe Suhaaga!

Dosto, aapko ye article kaisa laga ye niche comment section mein likhna na bhuliyega.

Aur agar aapko ye baatein pasand aayi ho to ise apne dosto ke saath Facebook aur Whatsapp par share jarur kijiyega.

Follow Facebook Page

Join Facebook Group

Submit your review
1
2
3
4
5
Submit
     
Cancel

Create your own review

The Android Artist
Average rating:  
 0 reviews

Leave a Reply

Your email address will not be published. Required fields are marked *